Le Blog de Youcef Allioui

IJEGGA AM DDA CRIF SBEDDADEN LAARAC – UR TTEMATEN ARA !

____________________________

Dda Crif yejja-yaγ… yerna ahbib-is n ddima… lεudd-is aqdim.

Dda Crif iggwed laâfu Ugellid Ameqqwran –  (ass 23 janvier 2012 – ass 10 Yennayer 2962).

                                 _____________________

Azul ay Iqvaliyen, Azul a Tiqvayliyin !

Azul ay imdukal, ttemdukal !
Azul ay ayetma, ttyessetma !

___________________________

Ddiγ ad ad-waliγ udem n Dda Crif Xeddam send a-t awin ar tmurt. Kniγ af wudem-is… af twenza-s.
Ufiγ atas n watmaten ttyessetmaten ig’gerwen dinna ar wutun 7 Bd Ménilmontant Paris wis-11.

I kunwi i-t ihemlen : rriγ llway (sslam) fell-as i-lmend s yismawen-nwen. I keccini a Majid, a gma : am akken i-k qqneγ : ssawved-as daγ sslam-ik.
D-ayen yesselmaden ul, i-mi ufiγ atas medden, iççur webrid bac as rren urawen i Dda Crif.

Mi nezmer a-neddakkdel di lqerh, Iban belli nezmer daγ a-nettdakkal lferh. D-aya-gi i’glaq a-nbeddel : akken qqaren zik-nni :

« Tadukli di liser weqbel tewser ! »

Acuγer kan ara nttemlil di twuγa ? Acuγer ur nezmir ara a-nemlil daγen di liser. I-mi ad d-rnuγ inzi nniden imezwura :

« Agdud ibennu di liser irennu di laâser ! ».

Tagmatt a Leqvayel ! Yal yiwen Uqvayli ilaq ad ihami gma-s Aqvayli ! Yal yiwen Umaziγ ilaq ad ihader Amaziγ naγ Tamaziγt ara d-imagger di tudert-is, deg’webrid-is.

Aqqen qqaren daγen Imezwura nneγ :
Akal kerz-it
Iger ssew-it
Axxam herz–it
Gma-k hader-it
Erfed w’ur nesâi ifadden
Ma d Rebbi, a-nef-as i medden !

Ammer a-neddukkel, kra gwin is yejjan akken iγ yejja  Dda Crif yakw d wid i-t izwaren : Jean Amrouche, Masin Harun, Slimane Azem, Dda Lmulud, Taher Oawut, Lwennas Matub, atg.  ur ttemmaten ara meblac, ur ttemmaten ara di tugwdi n tmeγlal n tsusmi n lebda.

M’ara yemmet wergaz amaziγ naγ m’ara temmet tsedna tamaziγt am Tawes Amrouche), ma yella agdud-is idukel, lmut-nni tettas-ed teshel. Akken iqqar baba ad yaâfu Rebbi fell-as : « M’ara duklen watmaten, lmut tettas-ed fsuset : amzun kan d-abrid i’gbeddel win iruhen yeggwi abrid-nni akw ara nawi. »

Bac a-nezmumeg cituh — di lehzen – agi — i-waken ad yefreh cituh Dda Crif i-mi yehzen i-mi yejja lεudd-is aqdim :

Asmekti yiwen wass yakw d Dda Crif Xeddam :

Mmektaγ -d asmi i d-inezwar di « La Mutualité » (di Lpari) netta d Nwara

« Tasedna Tuccbiht ». Azekka-nni, nemlal d-agraw di Inalco yakw d Mennad, Mhenna Mehfufi, d Salem Chaker d kra n yemdukal nniden.

Yedsa atas i-mi’s hkiγ ayen i-wi sliγ assen-nni ar yiwet temγart. Dγa nniγ-as :

« Ihun Rebbi a Dda Crif tecnidh-d « Nadya ». Axater, sliγ -as i yiwet temγart teqqim-ed zdat-i i-mi is tenna i temdakkelt-is : « Ad d-yecnu Nadya naγ as iniγ « Rumbursi !! »  Waqila teslid-as-d, i-mi imiren yakan trefdedh tecnid-aγ -d Nadya !! »
Yedsa atas send aken yenna-yaγ -d s-unecreh : “Af-aya-gi i d-ccniγ Nadya : mi-s d-sliγ i temγart-nni,  ugadeγ a-yi-d tini : “Rembursi !”

Dγa, nedsa yakw yid-es amzun d-arraw yezzin i baba-tsen naγ d-inelmaden yezzin i Wselmad nsen ameqqwran.

A-t Ig Ugellid Ameqqwran d Tgemmi-s ! Ijja-d agerruj n ccna, n lmusiqa, tmusni, n tayri, n tukli : bac a-neddakel !

Akken qqaren daγ  Imezwura : “Anda yella wul ad awdhen yergazen !”

Yusef Alliwi  (25 janvier 2012  – 12 Yennayer 2962.